Posted on

【體路專欄】巴黎奇蹟闖4強 阿特蘭大好鬼傷

足球,football,體路專欄
巴黎聖日耳門驚濤駭浪之下晉級4強!(Photo Credit: Paris Saint-Germain Twitter)

【體路專欄】149秒對你來講係咩慨念?2分鐘29秒?149秒喺籃球世界屬於非常充裕嘅時間,如果喺足球世界可以做嘅嘢其實唔太多,不過,如果你係巴黎聖日耳門嘅球迷,當然唔會認同我嘅講法。尋晚PSG上演驚天大逆轉,比賽末段用咗149秒反勝阿特蘭大,成為第一隊晉身歐聯四強球隊!

足球,football,體路專欄
阿特蘭大奮戰下慘被絕殺,但整體表現經已贏盡所有球迷掌聲!(Photo Credit: Atalanta Twitter)

贏了經驗 沒有輸尊嚴

要講PSG點樣反勝之前,大家絕對要比最大尊重阿特蘭大所有職球員。由今季意甲第3位衝線,全季攻入98個聯賽入球,各項賽事累計超過100個入球,再到歐聯小組賽最後三輪搶到7分躋身16強。淘汰賽擊敗華倫西亞到尋晚大戰PSG,球隊一如以往踢出風格,不論製造攻勢及反擊都有一定威脅性。不過,最可惜嘅係球隊欠缺板凳深度及經驗,柏沙歷早段入波唔能夠維持到完場,莫大原因同球隊後半段體力不繼,以及戰術調整變得保守有莫大關係。長城非一日建成,球隊非一季建立,希望各位阿特蘭大球迷繼續支持佢哋,如果你未係佢哋嘅球迷,呢隊波真係值得大家留意!

足球,football,體路專欄
尼馬(左)同安巴比絕對係呢場比賽關鍵球員!(Photo Credit: Neymar Twitter)

永不放棄搵入波 聖日耳門就得咗

球員個人能力同球隊板凳深度係呢場比賽決勝負關鍵,當PSG落後時候,教練杜曹可以選擇換入安巴比、卓普慕廷及達斯拿等攻擊能手,加強中路及邊路爆破能力,而兩個入波關鍵細節位同樣源自於「身後波」同「盲眼位」。

首先我哋睇一睇第1個失波嘅過程(圖4至圖6),當卓普慕廷由邊線大波入中(圖4),阿特蘭大球員防守位置並無太大錯誤,唯一挑剔係達利華(最右藍圈)與左中堅卡達拿(右二藍圈)距離較遠;其後當卓普慕廷嘗試傳中嘅時候(圖5),防守球員位置錯漏百出,顯然地過於集中望住個波,而非進攻球員,到最後馬昆奴斯喺門前輕鬆射入(圖6)。

足球,football,體路專欄
圖4
足球,football,體路專欄
圖5
足球,football,體路專欄
圖6

去到第二個失波嘅情況,PSG呢個進攻源自於一個反擊機會,因此,阿特蘭大球員沒有太多時間準備,經過連續幾次都唔能夠解圍,當尼馬有波在腳嘅時候,安巴比嘗試「走身後」突破防線(圖7),柏路文奴(最左藍圈)嘗試改變自己跑動方向經已姍姍來遲,卡達拿(左二藍圈)亦未能夠喺最適當位置保護及包抄柏路文奴。最終,安比巴輕鬆橫傳俾門前卓普慕廷射入,PSG因而上演絕地反勝。

足球,football,體路專欄
圖7

一日未完場一日都未知結果,兩對球員嘅努力造就一場精彩比賽,足球比賽就係咁殘酷,總要分出勝負,恭喜巴黎聖日耳門自1995年來首次晉身歐聯四強。其餘歐聯八強比賽包括RB萊比錫對馬德里體育會、巴塞隆拿大戰拜仁慕尼黑,以及曼城對里昂,即管睇吓最終歐聯同歐霸冠軍會係花落誰家。

此篇文章由「體路 Sportsroad」最初發表於「【體路專欄】巴黎奇蹟闖4強 阿特蘭大好鬼傷