Posted on

【體路專欄】倫敦打吡的啟示 球隊未來要正視

英格蘭足總盃,足球,體路專欄,阿仙奴,車路士
林柏特(左)同阿迪達今季首次領軍,雙方同樣為球隊帶來正面影響。(Photo Credit: Sports Twitter)

【體路專欄】上周末英格蘭足總盃決賽上演倫敦打吡戰,最終阿仙奴憑奧巴美揚梅開二度反勝車路士,奪得足總盃冠軍之餘,更取得直入下屆歐霸盃分組賽資格。激戰過後,係時候要需要檢討一下今季表現,對於贏波嘅阿仙奴,係咪真係冇地方可以再改善?對於輸波嘅車路士,點解會被睇高一線情況之下輸波?

英格蘭足總盃,足球,體路專欄,阿仙奴,車路士
大衛路爾斯(右)表現時好時壞,令球迷難以投下信心一票。(Photo Credit: Arsenal Twitter)

阿記防線要穩陣 防守集中要留神

講到阿仙奴第一樣要改善地方,必定係防線上穩健度。球隊對上7場比賽只得1場無失波,雖然中堅嘅大衛雷斯、梅斯達菲及柏巴斯達普路斯擁有一定實戰經驗,但卻缺乏具經驗球員應有嘅穩定性。防線整季表現時好時壞,聯賽以第8名完成,同時亦先後擊敗曼城同車路士奪得足總盃冠軍,證明球隊「發揮正常」嘅時候有一定實力。閘位有迪欣尼、比爾連、蕯卡及美倫賴奧斯,基本上未來幾年都唔需要搵新球員代替。今夏轉會市場務必尋找一名可依賴中堅球員,提升防線穩定性及集中度。

英格蘭足總盃,足球,體路專欄,阿仙奴,車路士
奧巴美揚繼續成為球隊進攻核心,一人之力帶領球隊奪得足總盃冠軍。(Photo Credit: Arsenal Twitter)

Auba成進攻核心 快速突破最醒神

自從阿迪達上任後,球隊進攻層面變得更多元化,再唔係單單等待入球機會,而係能夠創造機會。加列沙卡與施巴約斯配搭效果越來越鮮明,前者主要負責保持球隊攻守平衡,堵塞後半場漏動;後者係前者掩護下有更多活動空間參與同發動進攻。球隊進攻戰術上最大改變莫過於奧巴美揚嘅活動空間,喺阿迪達悉心部署下,好多時候會安排蕯卡或美倫賴奥斯兼任左翼位及左中場,令奧巴美揚可以有咗中場移到中鋒位置,聯同拉卡錫迪合作攻堅,同時解決咗佢哋唔能夠並存嘅問題。

英格蘭足總盃,足球,體路專欄,阿仙奴,車路士
魯迪加(左)已經係中堅上最值得信賴球員,佢必須要挺身而出統領防線。(Photo Credit: Rüdiger Twitter)

車仔防守唔細心 球員對待要認真

高水平足球比賽講求減少自己犯錯,把握對方犯錯。車路士今季後防真係周不時都會犯下錯誤,令球隊喺比賽中失利,關鍵點係球員做得唔夠仔細。領隊林柏特今季好多時候都會以基斯甸臣、蘇馬及魯迪加排出3中堅陣式,不過,由於3名球員單對單能力並不是特別出眾,加上欠缺速度,好多時候難以覆蓋所需要防守範圍,個人認為可以嘗試域斯占士及艾斯比利古達出任左右中堅,改善防線間位置感及提升互補能力。

英格蘭足總盃,足球,體路專欄,阿仙奴,車路士
添姆雲拿強勢加盟,大大增加球隊入球本錢。(Photo Credit: Chelsea Twitter)

前線三叉戟 倫敦變藍色

藍戰士今季第4名完成英超賽事,屬於所有倫敦球會之中最高排名,暫時林柏特已經買入射手添姆雲拿同翼鋒施耶治,加埋艾巴咸或基奧特,下季攻擊力有增無減!隨着今季主力韋利安大有機會離隊,整體進攻架構要重新思量,進攻選擇上添姆雲拿可勝任正前鋒及翼鋒,施耶治可踢左右兩翼,加上曼治預料繼續成為球隊核心,佢嘅後上入楔同竄擾能力,絕對可以改變球賽困局。因此,4-2-3-1陣式會較為適合,佐真奴、干堤及哥華傑治可輪流出任中場中位置。

場上進攻同防守都需要作出協調之外,當然,唔少得場外兩位領隊臨場調兵遣將,單以今季表現嚟睇,呢方面能力阿迪達喺林柏特之上。如果單計幾場比賽精心部署及職場調動,阿迪達會較為優勝;相反,如果以一整季表現嚟睇,林柏特表現會較為穩定。不過,不得不提嘅係,林柏特季初同季中都唔能夠買球員,能夠取得下季歐聯資格席位同打入足總盃決賽,已經係一張好理想嘅成績表,即管睇吓兩支倫敦球會夏季嘅表現會係如何。

此篇文章由「體路 Sportsroad」最初發表於「【體路專欄】倫敦打吡的啟示 球隊未來要正視