【體路專欄】上星期同大家簡短地分析咗歐洲4大聯賽現況，今個星期西甲終！於！開！波！即係話，依家有德甲同西甲，遲多幾日英超開埋就任君選擇。西甲復賽頭場戲碼係「塞維利亞打吡戰」，西維爾主場對貝迪斯，雙方過往47次對賽，西維爾取得21勝16和10負佳績。不過，對上6次對碰有5場以1球球差分勝負，可見雙方勢均力敵，打吡大戰份外落力。
雙翼齊飛西維爾 面對側擊唔容易
西維爾季初由教練盧柏迪利接手後主要排出4-3-3陣式，球隊崇尚以小組搓傳撕破對手防線，一對中堅觀迪及卡路士用波能力不容忽視，好多時候能夠透過轉方向製造威脅。中場大多數擺放倒三角形，費蘭度以單防中姿態出現，將中堅及中場互相緊扣。至於另一名中場班尼加喺費蘭度掩護之下，擁有更多活動空間做「派牌」工作，由於左右二閘域基朗同捷西斯拿華斯助攻力超強，班尼加有時以佢哋兩個作為傳球目標，長傳直接撕破對方防線。前鋒盧克迪莊雖然入球量偏低，但場上功用能夠媲美其他球員，不時為隊友製造進攻空間及入波機會。
疫情助終止劣勢 貝迪斯重上正軌
貝迪斯方面，比賽暫停前7場比賽僅得1勝，整個球季成績就好似過山車咁高低起伏，時好時壞。教練路比陣式上取決喺4-5-1或4-4-2之間，不過，所謂嘅4-4-2陣式，其實都只不過將右翼祖亞昆移上中鋒位，但落到場呢位老人家都係自由奔放地周圍走嚟走去，同踼左右翼無咩分別。後防上只有巴查獨力支撐，開季至今只有4場無失波，27場失43球係聯賽第3隊失波最多，即管睇下今場球員場上集中度同互相補位意識有無改善。進攻方面，球隊就醒神好多，27場入38球係聯賽第6隊入波最多，摩朗、祖亞昆及法基係球隊入球泉源，快速反擊就係球隊入波最強殺手鐧。
大戰當前，雙方領隊絕無鬆懈，盧柏迪利喺訪問提到：「球隊只有8日一齊訓練，亦有進行小部分11對11比賽，中場奥甘保斯今仗或缺陣。貝迪斯係一支優秀球隊，擁有技術水平較高及高速球員。」至於路比則在賽前訪問提到：「今場比賽有10日準備，查維加西亞及桑美可以隨時候命，但祖亞昆唔能夠踢足90分鐘。如果今場輸波，或會令球隊再次陷入困境！」
由於兩隊球員都太耐無比賽，開賽頭15分鐘極為關鍵，球員入局情況，上唔上力，能唔能夠盡快適應真正比賽節奏，將會直接成為比賽勝負分野。對西維爾嚟講，要小心貝迪斯快速反擊，特別當域基朗及捷西斯上前助攻嘅時候，點樣保護佢哋遺留嘅防線空間；對貝迪斯嚟講，絕對要減少班尼加控球機會同時間，邊路2 vs 2防守亦係今仗最大挑戰。從來逆境都要自強，一個疫情可能令你有另一番體會，無論如何，最重要係堅持信念，向著正確目標勇往直前！
此篇文章由「體路 Sportsroad」最初發表於「【體路專欄】塞維利亞打吡戰 西甲開波」
