【體路專欄】「人，不能改變他人，但人，能夠感染他人！」
人傳人威力有幾咁大，單睇近期疫情都一清二楚。無錯，一個人力量好有限，但如果能夠以行動感染身邊人，一齊向共同目標努力奮鬥，呢個力量絕對唔可以睇小！曼聯自從得到般奴費蘭迪斯加盟後表現大躍進，球員場上魔性澎湃積極爭取勝利，難怪大部分魔迷都大讚呢個收購非常好！
堤升串連性，組織無得頂
紅魔鬼過去幾季最大問題莫過於中場欠缺核心指揮官，天價收購普巴曾被寄予厚望，但表演欠缺穩定性及「睇心情」踢波令唔少球迷大跌眼鏡。今季中場麥湯文尼及費特大踢爭氣波，球隊重新搵到攻守平衡，提升場上表現穩定性。不過，般奴費蘭迪斯加盟為曼聯注入另類元素，不論引球推進、轉方向、控制節奏等（參下圖）都比隊中其他球員成熟。正因如此，球隊近期比賽運作暢順，比起以往更加「正常」，透過控制球賽節奏快慢主導比賽，而般奴費蘭迪斯更有把握將球由後場運送到前場，直接令前線球員受惠。
短短幾秒片段足以反映般奴費蘭迪斯閱讀球賽及轉方向能力（Credit：Youtube Channel ManuScout HD）
驚人創造力，俾波夠招積
踢波要贏就要入波，製造入波機會同等待入波機會完全係兩回事，以往曼聯單憑個人突破「期待」入球出現，如今般奴費蘭迪斯具備一定創造力，為隊友策動及製造埋門機會。自2017-2018球季起，般奴費蘭迪斯在離開士砵亭前一共創造咗239次入球機會、參與67個入波、271次射門有114次中目標等數據冠絕葡超，加盟曼聯後創造咗8次入球機會係全隊之首。表現及數據反映事實，般奴費蘭迪斯出眾傳控球技術為自己爭取更多觀察時間，頭腦聰明靈活多變令的人難以防範，個性永不言敗造就他邁向成功。
般奴費蘭迪斯這腳「助助攻」，令人聯想起史高斯的傳球能力。（Credit：ManchesterUntied Official YouTube Channel）
耳濡目染，羊群心理，全部因為人感染人，人影響人。般奴費蘭迪斯完美地融入曼聯，刺激其他隊友變得更好，曼聯未來仍然充滿未知數，但至少呢刻走向正確道路。將來，永遠無法計估，你只可以無時無刻盡自己最大能力做到最好，即是將來失敗，至少回望過去曾經努力過，付出過，問心無愧。
此篇文章由「體路 Sportsroad」最初發表於「【體路專欄】般奴照耀紅魔鬼 落場表現唔會曳」