Posted on

【體路專欄】感激過去一直支持 心中回憶永留彼此

 

願你喺另一國度繼續開心快樂,享受你鍾意嘅日子

【體路專欄】球迷係足球嘅根,球迷係球隊最強後盾,球迷係球員最大推動力。喺點評同分析今周英超之前,我希望藉此機會感謝一位本地波忠實擁躉:「Ricky,雖然你走得好突然,感謝你一直以來對本地波嘅支持同付出,感謝你場內場外噓寒問暖,為我加油打氣。天意弄人,疫情影響之下遺憾地未能同你食『說好的晚餐』,但願你喺另一個世界繼續追尋夢想,邊睇波邊飲啤酒,安息吧!」每次當有身邊人離開,總會提醒自己珍惜眼前人,珍惜身邊同擁有嘅一切。

(Photo Credit:Jamie Vardy Twitter)

榜首三隊三連勝 狐狸拆「城」就最醒

今周英超有唔少驚喜戰果,西布朗半場領先車路士3:0但最終被迫和3:3,繼2011年韋斯後,車路士成為首支半場落後3球嘅球隊能夠追和對手。至於3支榜首球隊利物浦、李斯特城及愛華頓繼續有穩定演出,分別擊敗阿仙奴、曼城及水晶宮。當中李斯特城對曼城比賽獲得三個12碼,而曼城幾個失波來自類近情況。由於曼城經常能夠控制比賽及主攻,防線會移得較前及暴露較多被進攻空間(可參考圖3及圖6),李斯特城球員利用曼城防線身後空間,嘗試「走身後」後上入楔(可參考圖3至圖6)直入心臟地帶。從圖中可以反映曼城防線有兩大改善地方,首先係左右兩閘卡爾獲加及賓祖文文迪與中堅位置相距太開(可參考圖3及圖5),其次係一對中堅艾歷加西亞及尼敦艾基並不處於最適合包抄位置。曼城賽後隨即宣布以6,500萬鎊由賓菲加買入中堅魯賓迪亞斯,領隊哥迪奥拿自上任後淨計後防都用咗4億英鎊買人,相當誇張!

圖3:曼城第一個失波早見華迪有好大跑動空間接應隊友傳送
圖4:右閘卡爾獲加姍姍來遲,包抄位置亦唔恰當,最終輸埋12碼
圖5:第二個失波左閘賓祖文文迪無徹底向內收,令迪拿曼斯可以傳出致命直線
圖6:華迪照板煮碗走身後,結果又成功獲得12碼

球證判決有冇錯 VAR做主角

講到今星期主角,繼續係視像助理裁判(VAR)!喺曼聯對白禮頓比賽出現戲劇性一幕,主球證卡雲拿響起完場哨子後,VAR主球證西蒙賀柏示意曼聯最後一擊角球過程中出現疑似12碼(Possible Penalty-Handball),最終經過覆核情況下曼聯獲判12碼。根據IFAB VAR手冊8.13條例(可參考圖7)球證做法實屬正確。

圖7:如球迷有興趣參閱VAR手冊詳情,可按此圖瀏覽

按入連結VAR手冊第28頁

圖8:新球例之下迪亞成為最新受害者

至於另一場比賽熱刺對紐卡素踢到下半場補時階段,紐卡素前鋒安德魯卡路爾一次頭槌攻門頂中同時跳起嘅迪亞(可參考圖8),結果主球證班斯再三覆核下判罰十二碼,最終卡林威爾遜射入雙方打成1:1平手。過去我哋一直談論手球主要依據手部咩位置接觸足球、手部有無貼近身體軀幹及球員身體動作係咪自然。今屆IFAB及英超賽會定出最新指引方便球證定奪,但究竟新指引係咪適合,仍然有待觀察!

此篇文章由「體路 Sportsroad」最初發表於「【體路專欄】感激過去一直支持 心中回憶永留彼此