【體路專欄】運動後補充嘅食物以簡單輕食為主，熱量控制喺大約300卡路里，盡量符合營養比例「碳水化合物3︰蛋白質1」，大家可以喺屋企準備方便攜帶嘅食物，放喺背囊，跑完步返屋企途中即可享用隨身恢復嘅點心。
我通常會準備：
五穀類︰全麥麵包，合桃包，花生醬/果醬三文治，蕃薯，粟米
生果類︰香蕉，蘋果，雪梨，藍莓
奶製品類︰朱古力奶，低脂乳酪，無糖/低糖豆漿
果仁及乾果類︰杏仁，腰果，提子乾
享受完跑步喜悅嘅同時，唔好忘記一啲飲食嘅小秘訣，讓身體充份恢復後，再迎接下一個挑戰！
文：香港跑手屈旨盈
此篇文章由「體路 Sportsroad」最初發表於「【體路專欄】運動與營養 – 跑完食咩補充好？」
【體路專訊】本地第三波肺炎疫情依然緊張，不少打工仔都要WFH（留家工作）避疫，然而長期在家，沉悶又易胖，點都要Keep fit。但若嫌一個人做運動孤單欠動力？Don’t worry！香港空手道代表李振豪（豪B）就孖住未婚妻EYan，教你5招Partner workout（雙人健體），好玩又見效，Ready~Go！
李振豪是香港首位確診新型肺炎的運動員，自3月中在法國訓練回港後中招，入院留醫51日終戰勝病魔，於5月7日出院。「豪B」出院後享受當下的同時也逐漸恢復訓練，冀盡快回復昔日最fit狀態，待比賽重啟時努力爭取東京奧運入場券。
由於本港疫情肺炎，康文署轄下體育設施、健身房等全部關閉，有見及此，「豪B」找來未婚妻EYan拍片示範健體Partner workout，鼓勵大家WFH亦要Keep住做運動，保持身心健康，今集短片推介了5式動作，每式要做45秒，完成後小休一分鐘再重複練習。每日持之以恒，包你fit到漏油！
此篇文章由「體路 Sportsroad」最初發表於「【抗疫都要Keep fit．有片】李振豪夥未婚妻教你5招WFH Partner workout」
【體路專訊】Reebok宣布重推不死戰神Allen Iverson的首對簽名戰靴，復刻當年首推只有5000對限定發售的Question Mid元祖配色「Red Toe」。為慶祝經典問世25週年，Reebok今回特意推出成人、小童及嬰兒鞋款；無論大小球迷都能以球鞋史上的傳奇鞋款，繼續傳承「戰神」不朽的意志與精神。
Reebok於1996年為當時還未變成「Answer」但即將改變NBA文化的新秀球員Allen Iverson打造首對簽名鞋款「Question」， Reebok從Iverson的日常生活和職業中進行研究，設計極具AI個人風格和才能的專屬籃球鞋。
Reebok Question Mid O.G. Red Toe保留原貌，採用白色優質皮革打造鞋身，與麂皮紅色鞋頭及鞋跟形成鮮明對比；鞋帶位置注入紅色細節點綴，更保留25年前原版的藍邊Vector Logo；將元祖配色完美重現，充滿懷舊氣息。
Reebok全新Question Mid O.G. Red Toe籃球鞋款將於8月21日指定店舖及Reebok香港官方網上商店上架；現凡購買Question Mid O.G. Red Toe籃球鞋款，即可獲贈極具收藏價值的BEYOND QUESTION BOOKLET乙本，數量有限，送完即止。
資料來源：公關提供
此篇文章由「體路 Sportsroad」最初發表於「Reebok重推Question Mid元祖配色 復刻不死戰神Allen Iverson首對簽名戰靴」
【體路專訊】繼韋婉婷上月在阿爾巴尼亞聯賽亮相後，再有香港女足代表外闖他投。台灣女子聯賽「台灣木蘭足球聯賽」今日（20日）Facebook專頁公布第3循環轉會名單，港隊門將吳卓蔚榜上有名、轉投3屆總冠軍台中藍鯨。
台灣木蘭足球聯賽專頁今午公布第3循環聯賽的轉會名單，當中暫列聯賽第2名的台中藍鯨簽入4人，包括賴聿祺、吳芳瑜、借入林奕含及簽下港隊門將吳卓蔚。現年23歲的吳卓蔚原效力本地聯賽冠軍愉園，近兩年隨愉園男子隊訓練，近年亦曾代表港隊出戰亞運、東亞錦外圍賽及女子土耳其盃等賽事。愉園指吳卓蔚於約兩個月前與台中藍鯨接洽，惟現時仍有部份文件未辦理好，所以尚未出發到台灣。
以台中市的太原足球場及豐原體育場作主場的台中藍鯨6年前成立，是木蘭聯賽的創會成員球會，過去3季均成為總冠軍。台灣木蘭聯賽因當地疫情一直受控而可以繼續舉行，4月至7月已先後完成首兩循環聯賽，第3循環會在本周末開始。除了吳卓蔚外，近年女足有多名代表外流其他國家聯賽，包括剛助Vllaznia成為「雙冠后」的韋婉婷、現效力基爾馬諾克的鍾貝琪及秦正行，以及曾奪澳職冠軍的張煒琪等。
此篇文章由「體路 Sportsroad」最初發表於「【女足】再有港女將外闖！「門神」吳卓蔚投台中藍鯨」
【體路專欄】最近喺Netflix睇咗一套關於安歷卡嘅紀錄片（安歷卡：全是誤解），內容主要提到佢自己過去足球生涯點點滴滴，20年間面對過好多唔同挑戰。總括而言，每分每刻盡自己最大努力交出表現，控制自己可以控制地方，具備強大心理質素面對壓力！唔經唔覺今季歐聯及歐霸踢到決賽，球員生理上要對抗疲勞，心理上亦要對抗壓力，歐洲冠軍誰屬，今個星期自有分曉！
歐霸盃決賽由國際米蘭迎戰西維爾，兩隊復賽後整體表現穩定，殺入決賽非常合理。國米4強以5：0大勝蕯克達，前鋒盧卡古及馬天尼斯各自梅開二度，自2004 / 05球季阿祖安奴及馬田斯後，首次兩位前鋒單季分別攻入20球或以上。除此之外，盧卡古成為史上第1位歐霸比賽球員連續10場入波，暫時今季攻入33個入球，差1球就可以追平球會傳奇朗拿度紀錄。球隊一如以往慣用3人防線，高甸及迪維積擁有豐富經驗，維持意大利球隊防守緊密及極具紀律性特色。進攻方面，球隊除咗依靠盧卡古及馬天尼斯進行快速反擊之外，左右翼位迪岩布斯奧及艾殊利楊格經常能夠製造傳中球，所產生威力絕對不容忽視。
西維爾分別喺2006、2007、2014、2015及2016年問鼎歐霸冠軍，連同今屆成為史上首支6次踢入歐霸決賽球隊，因此，大部份球迷都會叫歐霸盃為「西維爾盃」。教練盧柏迪利今季上任後大大提升球隊場上表現穩定性，球員徹底融入及適應戰術體系，場上分工清晰，清楚知道自己需要負責嘅範圍及工作，現時各項賽事20場不敗，僅次於拜仁慕尼黑（29場）。球隊進攻上甚為立體及極具侵略性，除咗左右兩翼蘇素及奧甘保斯外，左右二閘域基朗及捷西斯拿華斯經常上前參與助攻，透過中場大腦班尼加透過長傳轉方向，大多數能夠喺邊路製造人多打人少優勢。
今場比賽勝負關鍵在於兩隊邊路攻守轉換效率，以及防守中場協助兩邊防務工作效率性。國米需要防範西維爾「雙翼齊飛」踢法；西維爾需要想辦法對付盧卡古及馬天尼斯正面衝擊。
巴黎聖日耳門及拜仁慕尼黑將會上演歐洲王者對決，論近況兩隊不相伯仲，論實力拜仁略為秤先少少。不過，巴黎聖日耳門有效率及銳利嘅快速反擊將會成為今場贏波本錢。球會史上第1次殺入歐聯決賽，教練杜曹慣用4-3-3陣式，防線系統上泰亞高施華作為統領者，而馬昆奴斯近幾場移前出任防守中場位置，增加球隊中路攔截能力。不過，較可惜嘅係門將基羅拿華斯暫時仍然未知可唔可以趕及傷癒披甲，後備門將沙治奧域高需要隨時候命。進攻方面，尼馬、安巴比及迪馬利亞擁有好大自由度，基本上球隊冇特定中鋒，尼馬負責前場個人突破，安巴比專注以速度撕破對手防線，迪馬利亞作為中場同前線之間橋樑，為隊友鋪橋搭路。
拜仁慕尼黑可以話係現時歐洲狀態最好嘅球隊，過去29場錄得28勝1和驕人成績，一共攻入97個入球，平均每場3.34球，相當之得人驚！前鋒利雲杜夫斯基連續9場歐聯有波入，追平2003年曼聯前鋒雲尼斯達萊紀錄，今屆賽事暫時以15個入球高踞射手榜。拜仁有咁多個入波皆因佢哋有好多進攻點，前場目標有利雲度夫斯基同湯馬士梅拿，左右兩翼拿比及佩利鍚習慣內切移入中路，配合左右兩閘甘美治及阿方素戴維斯後上助攻，再加上中場哥列斯卡喜歡中路直搗皇龍殺入禁區，加加埋埋有7個進攻點！不過，凡事都有辣有唔辣，太過進取令後場未必有足夠防守保護，球隊大多數將艾簡達拿、謝路美保定及艾拿巴留守後場，但若然面對巴黎聖日耳門高速反擊，恐怕未能足夠應付。
踢法機動同簡單直接，擁有高效率攻守轉換係拜仁能夠控制比賽嘅關鍵。不過，唔好忘記巴黎聖日耳門擁有高速跑車安巴比、尼馬及迪馬利亞，隨時能夠透過突擊得手。預計呢場比賽巴黎聖日耳門會以穩守突擊踢法為主，雖然拜仁會有一定主導權，但肯定唔可以好似對上幾場比賽咁空群而出，令防守遺留太多被反擊空間。
此篇文章由「體路 Sportsroad」最初發表於「【體路專欄】歐聯歐霸爭冠軍 終極一戰要醒神」
