【體路廣島直擊】東方將於本周四（5日）下午4時（日本時間下午5時）的「AFC冠軍聯賽二級聯賽」（亞冠二）E組煞科戰挑戰廣島三箭，大軍今午（3日）到訪廣島廣域公園第一球技場作適應性練習。兼任青訓總監及U18主教練的黃鎮宇今次日本之旅亦有隨行，師承「魔鬼教練」黎新祥的他笑言，是想藉著亞冠二煞科戰的機會，親眼驗證一下一班青訓產品的表現。
東方今屆亞冠二5場E組賽事錄得1勝4負，雖然無望出線，但場上表現有目共睹，更可喜的是，馬希偉、吳宇曦、柏拔、楊棟棋都已先後登場，蕭政、高銘浩、張文浩及李俊霆等亦曾坐過後備席。之前兩場作客都沒隨隊的黃鎮宇，今日更索性換上球靴，落場踩踩草皮。他笑言：「我都想踩一踩日本啲靚場，因為呢啲機會唔係成日有！」轉頭他才認真回答：「其實係想睇吓班細路，今場已經係最後一場分組賽，可以同大家總結一下。」
黃鎮宇於2014年掛靴之後，曾經擔任東方一隊助教，近年主力搞青訓，如今身兼球會青訓總監及U18主教練。他直言現今一代青年球員比當年的自己幸福：「我自己當年要到加盟晨曦之後，先有機會打亞協，唔似佢哋一出道就踢亞冠！」他認為與現時足球趨勢有關：「無辦法，依家要年青化。以前我踢緊時，30歲都算好當打，依家當打係25、26歲，因為現今足球年代已經唔同哂，所以佢哋機會亦更加多。」
現時一班青訓產品在東方都經歷了最少3季，「宇哥」見證著自己一手栽培的心血能登上亞冠舞台，坦承心情既興奮又自豪：「心情一定係興奮，喺佢哋小時候，我對佢哋講，我最希望佢哋能夠喺最高舞台上表演。依家真真正正可以見到佢哋喺亞洲級別的舞台比賽，真係好值得自豪！」
馬希偉（Timmy）及吳宇曦現時已成為東方主力，叫「宇哥」評價兩位徒弟今屆亞洲舞台上的表現，他如數家珍逐一點評：「Timmy之前已踢過亞洲賽，只不過當年係亞協盃。今屆對廣島我哋丹尼爾頂入第一個波，就係Timmy喺邊線單對單過人，先搏到個角球返嚟。其實佢有自己獨特一面，佢好擅長喺中場轉身放20、30碼長傳，不過暫時未有機會發揮出嚟，但我相信當佢愈踢愈成熟，就會展現呢一面出嚟畀大家睇。」
至於踢法與自己相近的吳宇曦，他更看好必成大器：「宇曦好有條件成為一線球員，不過埋門把握力仲需要加強。佢嘅獨特條件就係『推波』同『過波』，呢種獨特條件就係很容易受到各界關注。佢今屆喺對廣島及澳洲兩場比賽都發揮得好好，尤其是廣島那一場，佢中場推進嗰幾下係好亮麗嘅，呢樣正正係我哋現今足球好需要，香港亦都好缺乏呢類型球員。近年中國聯賽好喜歡搵香港球員，我覺得佢同Timmy上去係遲早嘅事，不過首先就係要裝備好自己。」他又表示不怕東方一旦放走兩人會影響實力：「其實我哋一早有預算過會咁，所以青訓一直都有準備，梯隊入面不乏有潛質嘅新血，就正如之前孫銘謙離隊之後就有Timmy上，將來絕對唔驚無人接班。」黃鎮宇正是由已故的「魔鬼教練」黎新祥訓練出來，如今就是這樣一代傳一代，將香港足球血脈傳承下去。
圖、文：文森特
此篇文章由「體路 Sportsroad」最初發表於「亞冠二・直擊｜愛徒吳宇曦馬希偉打出名堂 黃鎮宇：既興奮又自豪」
